Sajmir Kumbaro, regjisori i njohur shqiptar i është drejtuar Gjykatës së Tiranës për të njohur ligjërisht pronësinë intelektuale mbi filmin “Vdekja e Kalit”. Regjisori ka depozituar padinë civile për të shmangur kështu që produksioni i tij të jepet vend e pa vend, ashtu siç po ndodh së fundmi edhe me shumë produksione të tjera të këtij niveli. Padia tashmë i ka kaluar fazat e para dhe pritet të nisë gjykimi për të. Sipas statistikave zyrtare të kësaj gjykate, muajt e fundit janë shtuar shumë paditë për mbrojtjen e pronësisë intelektuale. Specialistët jo pak herë janë shprehur se prona intelektuale nuk respektohet në vendin tonë. Megjithëse në Ministrinë e Turizmit, Kulturës Rinisë dhe Sporteve prej kohësh është themeluar Zyra për Mbrojtjen e të Drjetave të Autorit, duket se puna e saj është e padukshme dhe e pamjaftueshme për të garantuar të drejtat për të cilat tregu artistik, veprat dhe autorët kanë aq shumë nevojë. Pronësia intelektuale dhe shkelja e të drejtave ligjore të saj shpesh herë është vënë në debat. Ndërkaq, vjedhja sa vjen e bëhet më e theksuar sidomos në kinematografi dhe muzikë. Për të mos folur për miliona eurot që humbasin artistët dhe krijuesit shqiptarë nga mospërfillja dhe injorimi i së drejtës intelektuale, e cila u përket si pronësi. Ekzistojnë me dhjetëra uebsajte në internet, në të cilat mund të shikosh dhe shkarkosh falas çdo prodhim shqiptar, muzikor apo kinematografik, që nga më të vjetërit, deri tek ato të rejat, ndërkohë që në anën tjetër kemi një shtet të dobët, të pafuqishëm e ndonjëherë dhe indiferent për t’u përballur dhe për t’i ndaluar piratët e internetit dhe këtë vjedhje që u bëhet njerëzve të artit dhe kulturës. Shpesh është folur se regjisorëve tanë, automatikisht do t’ju njihej e drejta e pronësisë intelektuale për të gjitha filmat e prodhuara me financime shtetërore në kohën e Kinostudios “Shqipëria e Re” si edhe sot, megjithatë, problemet duket se ende nuk kanë marrë një zgjidhje përfundimtare dhe artistët enden në pritje dyerve të gjykatave.